உள்ளாட்சித் தேர்தல் : திமுகவுடன் கூட்டணி அமைக்கும் பாமக?

தமிழ்நாட்டில் கடந்த 2016ஆம் ஆண்டு நடைபெற வேண்டிய உள்ளாட்சித் தேர்தல் மூன்றாண்டுகளாக நடத்தப்படாமல் உச்ச நீதிமன்ற உத்தரவையடுத்து, 2019ஆம் ஆண்டில் நடைபெற்றது. பேரூராட்சி, நகராட்சி, மாநகராட்சி மற்றும் நெல்லை, தென்காசி, காஞ்சிபுரம், செங்கல்பட்டு, விழுப்புரம், கள்ளக்குறிச்சி, வேலூர், திருப்பத்தூர், ராணிப்பேட்டை ஆகிய 9 மாவட்ட ஊரகப் பகுதிகளுக்கு மட்டும் தேர்தல் நடைபெறவில்லை.

இது தொடர்பான வழக்கில் தீர்ப்பளித்த உச்ச நீதிமன்றம் செப்டம்பர் மாதத்துக்குள் தேர்தலை நடத்தி முடிக்க வேண்டு என்று உத்தரவிட்டுள்ளது. எனவே, வருகிற செப்டம்பர் மாதத்திற்குள் தேர்தல் நடத்தப்படலாம் என எதிர்பார்க்கப்படும் நிலையில், அரசியல் கட்சிகள் கூட்டணியை உறுதிபடுத்துவதை தீவிரப்படுத்தியுள்ளனர். கடந்த சட்டமன்றத் தேர்தலில் திமுக மாபெரும் வெற்றியை பெற்றுள்ளதால் அரசியல் ரீதியாக எதிர்வரவுள்ள உள்ளாட்சித் தேர்தல் முக்கியமற்றதாக தோன்றலாம்.

ஒப்பீட்டளவில் இந்த தேர்தல் முக்கியத்துவமற்றதாக இருப்பதற்கான ஒரு காரணம், நடைபெறவுள்ள உள்ளாட்சி தேர்தலில் 60 சதவீத பதவிகளுக்கான தேர்தல் கட்சி சார்ந்து இருக்காது. கட்சி சின்னங்கள் ஒதுக்கப்படாது. கட்சி சார்ந்து வேட்பாளர்கள் போட்டியிட மாட்டார்கள். கவுன்சிலர்கள் உள்ளிட்ட மீதமுள்ள 40 சதவீத பதவிகளுக்கு அரசியல் கட்சிகளின் சின்னங்களில் வேட்பாளர்கள் போட்டியிடுவார்கள். இந்த பதவிகளுக்கு போட்டியிடும் ஆளும் கட்சி வேட்பாளர்களுக்கு ஆதரவாக வாக்களிக்கவே மக்கள் முனைகிறார்கள் என்பது மற்றொரு காரணம்.

ஆனால், கூட்டணி கட்சிகளுக்கு இடையே நிலவி வரும் குழப்பங்கள், சச்சரவுகள் உள்ளிட்டவைகள் ஏதேனும் முக்கிய அரசியல் மாற்றத்துக்கு எதிர்வரவுள்ள உள்ளாட்சித் தேர்தல் காரணமாக இருக்குமா என்ற கேள்வியை எழுப்பியுள்ளது. கடந்த சட்டமன்ற தேர்தலில் அதிமுக, பாஜக,
பாமக உள்ளிட்ட கட்சிகள் இணைந்து தேர்தலைச் சந்தித்த நிலையில், சலசலப்புகள் இருந்தாலும் கூட்டணி தொடரும் என்று பாஜக – அதிமுக தலைவர்கள் வெளிப்படையாக அறிவித்துள்ளனர். ஆனால், கூட்டணியில் உள்ள பாமகவின் நிலைப்பாடு என்ன என்பது குறித்து இதுவரை அறிவிக்கப்படவில்லை.

இதனிடையே, பாமக தலைவர் ஜி.கே.மணி அண்மையில் முதலமைச்சர் ஸ்டாலினை சந்தித்து வன்னியர்களுக்கு 10.5 சதவீத உள்இட ஒதுக்கீடு வழங்கியதற்கு நன்றி தெரிவித்தார். தொலைப்பேசியில் ஸ்டாலினை தொடர்பு கொண்டு பாமக நிறுவனர் ராமதாஸ் நன்றி தெரிவித்துள்ளார். இது ஒருபுறம் இருக்க சட்டமன்றத்தில் கருணாநிதி உருவப்பட திறப்பு விழாவை அதிமுக புறக்கணித்த நிலையில், பாஜக, பாமக, தமிழ் மாநில காங்கிரஸ் உள்ளிட்ட கட்சித் தலைவர்கள் கலந்து கொண்டனர்.

இந்த விவகாரங்களை பாமக திமுகவுடன் நெருக்கம் காட்டி வருவதை உணர்த்துவதாக, திமுகவின் செயல்களை பாமக வரவேற்பதோடு ஆதரவு கொடுக்கும் எண்ணத்தில் இருப்பதாகவும் அரசியல் விமர்சகர்கள் கூறுகின்றனர்.

பாமகவைப் பொறுத்தவரை, வட தமிழகத்தில் வலிமையான கட்சி என்பதை உள்ளாட்சித் தேர்தலில் தக்க வைப்பது பெரும் சவாலாக இருக்கலாம். கடந்த சட்டமன்றத் தேர்தலில் வட மாவட்டங்களில் அக்கட்சி கடுமையான பாதிப்புக்கு உள்ளானது. எனவே, வெற்றிப் பாதையில் இருக்கும் திமுக பக்கம் சாய்ந்து, வட மாவட்டங்களில் பாமக தனது இருப்பை வலுப்படுத்த விரும்புவதாக தெரிகிறது.

திமுகவை பொறுத்தவரை அண்மையில் நடந்து முடிந்த சட்டமன்ற தேர்தலில் மாபெரும் வெற்றி பெற்றதையடுத்து உள்ளாட்சி தேர்தலிலும் வெற்றியை கைப்பற்ற முனைப்பு காட்டி வருகிறது. குறிப்பாக 8 வட மாவட்டங்களில் உள்ள 53 தொகுதிகளில் 43 தொகுதிகளை சட்டமன்றத் தேர்தலில் திமுக கைபற்றியது. அதனை இன்னும் வலுவாக்க அக்கட்சி முயற்சிகளை மேற்கொண்டு வருகிறது.

இந்த வெற்றி ஒருபுறம் இருந்தாலும், 10.5 சதவீத உள் இடஒதுக்கீடு அரசாணை உள்ளிட்டவைகள் மூலம் வன்னியர்களை கவர திமுக தொடர்ந்து முயற்சித்து வருகிறது. உள்ளாட்சி தேர்தல் நடைபெறவுள்ள 9 மாவட்டங்களில் 7 மாவட்டங்களில் வன்னியர்களின் வாக்குகள் அதிகமாக இருப்பதால், பாமகவை கூட்டணிக்குள் திமுக இழுக்கலாம் என்று கூறப்படுகிறது.

ஆனால், வன்னியர்களுக்கான அறிவிப்புகள் பாமகவை கூட்டணிக்குள் சேர்ப்பதற்கு அல்ல என்று திமுக தலைவர்கள் தெரிவித்து வருகின்றனர். ஏற்கெனவே பாமக இருக்கும் கூட்டணியில் விசிக இடம்பெறாது என்று அக்கட்சி அறிவித்துள்ளதால், பாமக கூட்டணிக்குள் வரும்பட்சத்தில் அக்கட்சியின் நிலைப்பாடு என்னவாக இருக்கும் என்பதையும் பார்க்க வேண்டும். உள்ளாட்சித் தேர்தலில் திமுக வெற்றி பெற்றாலும், அக்கட்சி இதுவரை ஆற்றிய பணிகளுக்கு கிடைத்த அங்கீகாரமாகவே அது பார்க்கப்படும் என்கிறார்கள் அரசியல் நோக்கர்கள்.

அதிமுக கூட்டணியில் பாமக அங்கம் வகிக்கிறது என்றும், கூட்டணியை மாற்றுவது தொடர்பான கேள்வியே எழவில்லை என்று பாமக தலைவர்கள் தெரிவிக்கின்றனர். “தேர்தல் சமயத்தில் கூட்டணி தொடர்பாக தலைவர்கள் முடிவெடுப்பார்கள்” என்று பாமக மூத்த தலைவர் பாலு தெரிவித்துள்ளார்.

இது தொடர்பாக கருத்து தெரிவித்துள்ள திமுக செய்தித் தொடர்பாளர் கான்ஸ்டைன்டைன் ரவீந்திரன், அதிமுக ஆட்சியில் இருந்த போதே 2019ஆம் ஆண்டில் நடைபெற்ற ஊரக உள்ளாட்சித் தேர்தலில் வடமாவட்டங்களில் 50 சதவீதத்தை திமுக வென்றது. தற்போது ஆட்சியமைத்திருக்கிற சூழலில் எங்களின் செல்வாக்கு உயர்ந்திருக்கிறது. எனவே, 100 சதவீதம் வெற்றி பெறுவோம் என தெரிவித்துள்ளார். மேலும், பாமக, தேமுதிக கூட்டணி எங்களுக்கு தேவையற்றது என்றும் அவர் கருத்து தெரிவித்துள்ளதுடன், உள்ளாட்சித் தேர்தலில் கூட்டணி மாற்றங்கள் எதுவும் இருக்காது என்று தான் நம்புவதாகவும் தெரிவித்துள்ளார்.

அதே நேரத்தில், பாமக தற்போது வரை தங்கள் கூட்டணியில் தொடர்வதாகவும், அதிமுக தேர்தலை சந்திக்க தயாராக உள்ளதாகவும் முன்னாள் அமைச்சரும், அதிமுக மூத்த தலைவர்களில் ஒருவருமான ஜெயக்குமார் கூறியுள்ளார்.

திமுகவின் செயல்களை பாமக வரவேற்பது உள்ளிட்டவைகளை பார்க்கும் போது, யூகங்களின் அடிப்படையில், உள்ளாட்சித் தேர்தலில், பாமக திமுக உடன் கூட்டணி அமைக்கும் எண்ணத்தில் இருப்பதாக தெரிகிறது. ஆனால், சேலம், தருமபுரி மற்றும் கிருஷ்ணகிரி தொகுதிகளில் அதிமுகவை வெற்றிபெற வைத்ததால், பாமகவை கூட்டணியில் தக்க வைத்துக் கொள்ளவே அதிமுக விரும்புவதாக தெரிகிறது.

“உள்ளாட்சித் தேர்தல்கள் ஆளும் கட்சிக்குச் சாதகமானதுதான் என்றாலும், வட மாவட்டங்களில் திமுக தங்களை நிரூபிக்க வேண்டியுள்ளது. சேலம், தருமபுரி, கிருஷ்ணகிரி மாவட்டங்களில் திமுகவின் வெற்றியை உறுதி செய்ய பாமக உதவி புரிய வாய்ப்புள்ளது. கூட்டணி மாற்றங்கள் ஏற்பட்டால், அது அடுத்து வரவுள்ள தேர்தல்களுக்கானதாக இருக்கும். உள்ளாட்சித் தேர்தல் என்பது அதற்கான முன்னோட்டமாக இருக்கும்” என்று மூத்த பத்திரிகையாளர் தராசு ஷ்யாம் கருத்து தெரிவித்துள்ளார்.

– நமது நிருபர்