கோவில் நிலங்கள் ஆக்கிரமிப்பு…கட்சி பாகுபாடின்றி நடவடிக்கை எடுக்கப்படும்.

தமிழக இந்து சமய அறநிலைத்துறை சார்பில் முழு மாத சம்பளமின்றி பணியாற்றும் அர்ச்சகர்கள், பட்டாச்சாரியார்கள், பூசாரிகள் மற்றும் பிற பணியாளர்களுக்கு ரூபாய் 4 ஆயிரம் உதவித்தொகை மற்றும் 15 வகையான மளிகைப் பொருட்கள், அரிசி வழங்கும் விழா ராமநாதபுரம் மாவட்டம் பரமக்குடி மீனாட்சி அம்மன் கோவில் வளாகத்தில் நடைபெற்றது. இந்த விழாவிற்கு இந்து சமய அறநிலை துறை அமைச்சர் சேகர்பாபு கலந்து கொண்டு 198 பேருக்கு நலத்திட்ட உதவிகளை வழங்கினார்.

இந்த நிகழ்ச்சியில் பரமக்குடி எம்எல்ஏ முருகேசன், முன்னாள் அமைச்சர்கள் சுப தங்கவேலன், டாக்டர் சுந்தர்ராஜ் உள்பட பலர் கலந்து கொண்டனர்.
இந்து சமய அறநிலை துறை அமைச்சர் சேகர்பாபு செய்தியாளர்களிடம் பேசுகையில்..

கொரோனா வைரஸ் தொற்றால் பாதிப்பு இருக்காது என்ற நிலை வந்தவுடன் கோவில்களில் பக்தர்கள் தரிசனம் செய்ய வழிவகை செய்யப்படும். சிவகங்கையில் அபகரிப்பு செய்யப்படிருந்த 10 ஏக்கர் கோவில் நிலம் மீட்கப்பட்டுள்ளது. அந்த நிலத்தை முதலமைச்சர் வழிகாட்டுதல்படி இன்று ஆய்வு செய்ய வந்தேன்.

கோவில் நிலம் அபகரிப்பு தொடர்பாக ஆய்வு செய்து விசாரணை நடத்தப்பட்டு வருகிறது. விசாரணை முடிவில் யார் தவறு செய்திருந்தாலும், திராவிட முன்னேற்றக் கழகத்தை சேர்ந்தவர்கள் கூட தவறு செய்திருந்தாலும் உரிய நடவடிக்கை எடுக்கப்படும் என மாண்புமிகு முதலமைச்சர் அவர்கள் கூறியுள்ளார்.

அதேபோல் கோயில் நிலத்தை யார் அபகரிப்பு செய்து இருந்தாலும் அவர்கள் சட்டத்தின் பிடியில் இருந்து தப்ப முடியாது. “” தவறுகளை தேவனே தெரிந்து செய்தாலும் விடமாட்டேன் “” என்ற பாடல் வரிகளுக்கு ஏற்ப இன்று தவறு யார் செய்திருந்தாலும் முன்னாள் அமைச்சர்களாக இருந்தாலும் சரி, இந்நாள் அமைச்சர்களாக இருந்தாலும் சரி அவர்கள் மீது நடவடிக்கை எடுக்கப்படும். தனியார் பிடியில் கோயில்கள் இருப்பதை அனுமதிக்க முடியாது, அதனை இந்து சமய அறநிலையத்துறை கட்டுப்பாட்டில் கொண்டு வர நடவடிக்கை எடுக்கப்படும்.

பரம்பரை அறங்காவலர்கள், பரம்பரைத் தக்கார்கள் இருந்தால் அவர்களின் செயல்பாடுகளையும் அரசு அதிகாரிகளை நியமித்து ஏதேனும் தவறு செய்தால் அவர்கள் மீதும் உரிய நடவடிக்கை எடுக்கப்படும். திமுக ஆட்சியில்தான் நிருபர்களின் கேள்விக்கு முழுமையாக பதில் அளிக்கிறோம் என கூறினார்.