நகைச்சுவை அரசியலை நிறுத்துங்கள் ஜெயக்குமார் : கே.எஸ்.அழகிரி

அதிமுக கூட்டணியில் இடம்பெற்றுள்ள கட்சிகள் முன்னுக்குப் பின் முரணான கருத்துகள் தெரிவித்து வரும் நிலையில் கூட்டணியில் எந்தெந்த கட்சிகள் உள்ளன என்ற கேள்வி எழுந்தது.

இந்நிலையில் திமுக கூட்டணி தொடர்பாக மீன்வளத்துறை அமைச்சர் ஜெயக்குமார் தொடர்ந்து விமர்சித்து வருகிறார். திமுக தலைமையிலான கூட்டணி வாகனத் தயாரிப்புத் தொழில் முடங்கியிருப்பதைப் போல செயலற்று இருப்பதாக அண்மையில் பேசினார். மேலும் அவர் திமுக கூட்டணியிலிருந்து விலகி பல கட்சிகள் அதிமுக கூட்டணியில் சேர இருப்பதாகவும் கூறினார்.

இந்நிலையில் திமுக கூட்டணியில் அங்கம் வகிக்கும் காங்கிரஸ் கட்சியின் தலைவர் கே.எஸ்.அழகிரி அறிக்கை ஒன்றை வெளியிட்டுள்ளார்.
“அடிப்படையே இல்லாமல் ஆதாரமற்ற அவதூறு கருத்தைக் கூறியிருக்கிறார் அமைச்சர் ஜெயக்குமார். எங்கள் கூட்டணி மக்கள் நலன் சார்ந்து நீண்டகாலமாக ஒற்றுமையுடன் கட்டுக்கோப்பாகச் செயல்பட்டு வருகிறது. இந்தக் கூட்டணியின் தலைவராக மு.க.ஸ்டாலின் மிகச்சிறப்பாக ஒருங்கிணைத்து வழிநடத்தி வருகிறார்.

மதச்சார்பற்ற முற்போக்குக் கூட்டணி என்பது ஒரு கொள்கைக் கூட்டணி. அதிமுக – பாஜக கூட்டணியைப் போல சந்தர்ப்பவாதக் கூட்டணி அல்ல. திமுக தலைமையில் கூட்டணிக் கட்சிகள் அடிக்கடி கூடி விவாதித்து முடிவெடுப்பதைப்போல அதிமுக கூட்டணிக் கட்சிகள் என்றைக்காவது மக்கள் பிரச்சினைகள் குறித்துக் கூடிப் பேசியிருக்கிறதா? விவாதித்திருக்கிறதா? முடிவெடுத்திருக்கிறதா?

கூட்டணிக் கட்சிகள் கருத்தொற்றுமையுடன் செயல்பட வேண்டும். ஆனால், அதற்கு முற்றிலும் மாறாக, கூட்டணிக் கட்சி என்ற அடிப்படை இலக்கணத்தைக் கூட நடைமுறையில் கடுகளவும் கடைப்பிடிக்காத அதிமுக கூட்டணியை என்னவென்று அழைப்பது?

அதிமுக கூட்டணியில் பாஜக இருக்கிறதா? இல்லையா? என்பதே ஒரு கேள்விக்குறியாக உள்ளது. அதிமுக கூட்டணியில் எந்தெந்த கட்சிகள் அங்கம் வகிக்கின்றன என்ற பெயரை டி.ஜெயக்குமாரால் வெளியிட முடியுமா?

கடந்த 2019 மக்களவைத் தேர்தலில் கூட்டணி அமைத்துப் போட்டியிட்ட கட்சிகளில் எந்தெந்த கட்சிகள் அதிமுகவுடன் கூட்டணியில் இருக்கிறது என்பதே சிதம்பர ரகசியமாக இருக்கிறது. இந்நிலையில், எஃகு கோட்டை போல உறுதியாகச் செயல்பட்டு வருகிற திமுக தலைமையிலான கூட்டணியைப் பற்றிப் பேச டி.ஜெயக்குமார் உள்ளிட்ட அதிமுகவினர் எவருக்கும் எந்தத் தகுதியும் கிடையாது. எப்போதும் போல நையாண்டி பேசி, நகைச்சுவை அரசியல் நடத்துவதை தமிழக அமைச்சர் ஜெயக்குமார் நிறுத்திக்கொள்ள வேண்டும்” என்று குறிப்பிட்டுள்ளார்.

– சிவா