மருத்துவக் கழிவுகளிலும் தவறான கணக்கு : பூவுலகின் நண்பர்கள் குற்றச்சாட்டு..!

தமிழ்நாட்டில் அரசு மற்றும் தனியார் மருத்துவமனைகளில் பயன்படுத்தப்பட்ட சுயப் பாதுகாப்பு உபகரணங்கள் (PPE Kit), முகக்கவசங்கள், கையுறைகள், பயன்படுத்தப்பட்ட ஊசிகள், கொரோனா பரிசோதனைக்குப் பயன்படுத்திய ஆர்.டி.பி.சி.ஆர். கிட் (rtPCR Kit ) உள்ளிட்டவை மருத்துவக் கழிவுகளாக (Medical Waste) மாறியுள்ளன.

நோய்த் தொற்று அபாயம் உள்ள இந்த மருத்துவக் கழிவுகளை, முறையாக மூடப்பட்ட குப்பை வண்டிகளில் எடுத்துச் சென்று, பாதுகாப்பாகவும் – உரிய முறையிலும் ‘‘Incinerator’’ கொண்டு எரிக்க வேண்டும். இவற்றைக் கண்காணித்து, உரிய முன்னெச்சரிக்கை முறைகளைக் கையாண்டு, அப்புறப்படுத்தி, அவற்றை அழித்து, நோய்த் தொற்று பரவாமல் தடுக்க வேண்டிய முக்கியமான பணி தமிழ்நாடு மாசுக் கட்டுப்பாட்டு வாரியத்திற்கு உரியதாகும்.

இந்த நிலையில், கொரோனா காலத்தில் அகற்றப்பட்ட மருத்துவ கழிவுகள் குறித்து தமிழ்நாடு மாசு கட்டுப்பாட்டு வாரியம் விளக்கம் அளித்துள்ளது. அதன்படி, இதுவரை 490 டன் மருத்துவக் கழிவுகள் முறையாக அகற்றப்பட்டுள்ளதாக தெரிவிக்கப்பட்டுள்ளது.
ஆனால் இந்த விளக்கம் பல்வேறு விமர்சனங்களை எழுப்பியுள்ளது. மார்ச் மாதத்தில் இருந்து தற்பொழுது வறை 4.9 லட்சம் கிலோ அதாவது 202 மையங்களில் இருந்து கிட்டதட்ட 90 நாளைக்கு 490 டன் மருத்துவக் கழிவு தமிழ்நாட்டில் முறையாக அகற்றபட்டிருப்பாதாக தமிழ்நாடு மாசுகட்டுப்பாட்டு வாரியம் அறிவித்திருக்கிறார்கள். ஆனால் கேரளாவில் மார்ச் 19ல் இருந்து மே31 வரையில், 40 நாட்களில் 82 மையங்களில் இருந்து சுமார் 14.9 லட்சம் கிலோ மருத்துவக் கழிவுகளை அகற்றியிருப்பதாக கேரள அரசு அறிவித்துள்ளது.

இதனால் தமிழ்நாடு அரசு முரணான கணக்கை தெரிவித்துள்ளதாக பூவுலகின் நண்பர்கள் அமைப்பு குற்றம் சாட்டியுள்ளது. “40 நாட்களில் கேரளாவில் உள்ள 82 மையங்களில் இருந்து வெளியேறிய மருத்துவக் கழிவின் அளவில் மூன்றில் ஒரு பங்கு கூட 90 நாட்களில் தமிழகத்தின் 202 மையங்களில் இருந்து வெளியேறவில்லை என்று கணக்கு சொல்லியிருக்கிறார்கள்.
சராசரியாக சாதாரண நேரங்களில் தமிழ்நாட்டில் நாள் ஒன்றுக்கு 47.2 டன் மருத்துவக் கழிவுகள் உருவாகின்றன. (CPCB report 2018). அப்படி என்றால் 47.2 x 90= 4248 டன். (42.5லட்சம் கிலோ) மருத்துவக் கழிவு.

கொரோனா காலங்களில் இயல்பை விட 5 முதல் 8 மடங்கு அதிக மருத்துவக் கழிவு (குறிப்பாக அபாயகரமான yellow bin waste) வெளியேறுவதாக தெரிகிறது. அதன்படி 42.5 லட்சம் x 5 = 212.5 லட்சம் கிலோ மருத்துவ கழிவுகள் இந்த 90 நாட்களில் பாதுகாப்பாக அகற்றப்பட்டிருக்க வேண்டும்.

212 லட்சம் கிலோ மருத்துவக் கழிவுகளில் வெறும் 4.9லட்சம் கிலோ தான் பாதுகாப்பான முறையில் அகற்றப்பட்டது என்றால் மீதமுல்ல மருத்துவக் கழிவுகளை என்ன செய்தீர்கள்?
இப்படி தான் கடந்த வாரம் சுற்றுச்சூழல் துறை அமைச்சர் கருப்பண்ணன் பத்திரிக்கையாளர்களை சந்திக்கும் பொழுது 32 இடங்களில் மருத்துவக் கழிவுகளை பாதிகாப்பான முறையில் அகற்ற அனுமதி தந்திருப்பதாக குறிப்பிட்டிருந்தார். ஒரு நாளைக்கு வெறும் 33 டன் மட்டுமே சுத்திகரிக்க முடிகின்ற 8 Common Bio Medical Waste Treatment Facility (CBMWTF) ஐ வைத்துக்கொண்டு 8 மடங்கு அதிகம் உற்பத்தியாகும் கொரோனா மருத்துவக் கழிவுகளை சாமளிக்க முடியாது என்ற உண்மையை முதலில் ஒப்புக்கொள்ளுங்கள்” என்று பூவுலகின் நண்பர்கள் அமைப்பைச் சேர்ந்த பிரபாகரன் தெரிவித்துள்ளார்.

– வேல்மணி