இரண்டு தொகுதிகளில் போட்டி… : சசிகலாதான் பிரசாரம் செய்யப்போகிறார்..! – : டிடிவி தினகரன்

அம்மா மக்கள் முன்னேற்ற கழகம் வருகிற சட்டப்பேரவை தேர்தலில் கூட்டணி அமைத்து சிறப்பான வெற்றியை பெறும் என அக்கட்சியின் பொதுச்செயலாளர் டிடிவி தினகரன் தெரிவித்துள்ளார்.

அதிமுகவில் இருந்து ஓரங்கட்டப்பட்ட பின்னர் ஆர்.கே.நகர் சட்டப்பேரவையில் சுயேட்சை வேட்பாளாராக களமிறங்கி வெற்றி பெற்றார். அதன்பின்னர் அம்மா மக்கள் முன்னேற்ற கழகம் என்ற அமைப்பை தொடங்கிய டிடிவி மக்களவை, சட்டப்பேரவை இடைத்தேர்தலில் களம் கண்டார். அதில் அவரது கட்சி தோல்வியடைந்தது. தொடர்ந்து, கட்சியாக பதிவு செய்யப்பட்ட அம்மா மக்கள் முன்னேற்ற கழகம், உள்ளாட்சித் தேர்தலில் தனித்து போட்டியிட்டு 3ஆவது இடத்தை பிடித்தது.

இந்நிலையில், சென்னை ராயப்பேட்டையில் புதிய எழிலோடு உருவாகியுள்ள அம்மா மக்‍கள் முன்னேற்றக்‍ கழகத்தின் புதிய தலைமைக்‍ கழக அலுவலகத்தை டிடிவி தினகரன் ரிப்பன் வெட்டி திறந்து வைத்தார். இதில் கழக முக்கிய நிர்வாகிகள் வெற்றிவேல், சி.ஆர்.சரஸ்வதி உள்ளிட்ட பலர் கலந்து கொண்டனர். தொடர்ந்து, புதிய தலைமைக்‍கழக அலுவலகத்தில் அலங்கரித்து வைக்கப்பட்டிருந்த தந்தை பெரியார், பேரறிஞர் அண்ணா, எம்.ஜி.ஆர்., ஜெயலலிதா ஆகியோரின் திருவுருவப் படங்களுக்‍கு மலர் தூவி மரியாதை செலுத்தினார்.

அதன்பின்னர் செய்தியாளார்களை சந்தித்த டிடிவி தினகரன், அமமுகவுக்கு விரைவில் தேர்தல் ஆணையம் சின்னம் வழங்கும். வருகிற சட்டப்பேரவை தேர்தலில் வலுவான கூட்டணி அமைத்து மாபெரும் வெற்றியை அம்மா மக்கள் முன்னேற்ற கழகம் பெறும் என்றார். தேர்தல் உத்தியாளர் பிரசாந்த் கிஷோர் போன்றோர் அமமுகவிற்கு தேவையில்லை என்றும், அனுபவம் வாய்ந்த நிர்வாகிகளும், தொண்டர்களே போதும் எனவும் தெரிவித்த டிடிவி தினகரன், அவர்களது ஆற்றலால் தேர்தலில் வெற்றி பெற்று ஆட்சியமைப்போம் எனவும் தெரிவித்தார்.

சசிகலா மிக விரைவில் சிறையில் இருந்து வெளிவர சட்டப்படி நடவடிக்கை எடுத்து வருகிறோம் எனவும், அவர் வெளியில் வந்த பிறகு எங்களுடன் தான் இருப்பார் எனவும் டிடிவி தினகரன் திட்டவட்டமாக தெரிவித்தார்.

ரஜினியின் கட்சி கொள்கை என்பது அவரின் தனிப்பட்ட கருத்து ஆகவே நாம் தலையிடுவது சரியாக இருக்காது. வடிவேலு மிகப்பெரிய ஒரு நகைச்சுவை நடிகர் ஆனால் அவர் தற்போது ஒதுங்கி இருக்க காரணம் தற்போது தமிழகத்தில் ஏராளமான நகைச்சுவை நடிகர்கள் வந்துள்ளார்கள் என பல்வேறு அமைச்சர்களை சுட்டிக்காட்டி பேசினார்.

வரும் சட்டப்பேரவை தேர்தலில் 2 தொகுதிகளில் போட்டியிட உள்ளதாக அம்மா மக்கள் முன்னேற்றக் கழகப் பொதுச் செயலாளர் டிடிவி தினகரன் தெரிவித்துள்ளார்.

சென்னை இராயப்பேட்டையில் அம்மா மக்கள் முன்னேற்ற கழகத்தின் புதிய அலுவலகத்தை அக்கட்சியின் பொது செயலாளர் டிடிவி.தினகரன் திறந்து வைத்து, கட்சிக் கொடியை ஏற்றினார்.

பின்னர் செய்தியாளர்கள் கேள்விகளுக்கு பதில் அளித்த டிடிவி தினகரன், வரும் சட்டமன்ற தேர்தலில் அமமுக தலைமையில் ஒரு பெரிய கூட்டணி அமைத்து தேர்தலைச் சந்திக்க உள்ளதாகவும், சிறையில் இருந்து விடுதலையாகி சசிகலா தமிழகம் முழுவதும் தேர்தல் பிரச்சாரம் மேற்கொள்ள உள்ளதாகவும் தெரிவித்தார்.

வரும் சட்டமன்ற தேர்தலில் ஏற்கனவே போட்டியிட்டு வெற்றிபெற்ற ஆர்.கே நகர் தொகுதியிலும், தென் மாவட்டத்தில் ஒரு சட்டமன்ற தொகுதி என இரண்டு தொகுதிகளில் போட்டியிட முடிவு செய்துள்ளதாக டிடிவி.தினகரன் தெரிவித்தார்.

முதல்வர் ஆகும் ஆசை தனக்கு இல்லை என நடிகர் ரஜினி கூறியிருப்பது, அது அவருடைய முடிவு, அது குறித்து விமர்சனம் செய்ய விரும்பவில்லை என கூறிய டிடிவி, என்.பி.ஆர் ,என்.ஆர்.சி, சிஏஏ சட்டம் பாராளுமன்றத்தில் நிறைவேற்றப்பட்ட நிலையில், சட்டமன்றத்தில் இந்த சட்டத்திற்கு எதிராக தீர்மானம் நிறைவேற்றினால், அது எந்தவித மாற்றத்தையும் ஏற்படுத்தாது எனவும் டிடிவி தினகரன் தெரிவித்தார்.

– நமது நிருபர்