பசியால் இறக்கும் குழந்தைகள் இந்தியாவில்தான் அதிகம்..!

உலக அளவில் பசிக் கொடுமை ஒழிப்பு நடவடிக்கைகள் அடிப்படையில் இந்தியாவின் இடம் பாகிஸ்தான், இலங்கை, வங்கதேசம், நேபாளம் முதலிய அண்டை நாடுகளைவிட மிக மோசமான நிலையில் உள்ளது.

உலகளாவிய பசி ஒழிப்பு நாடுகளின் தர வரிசை ஆண்டுதோறும் அக்டோபர் மாதம் வெளியிடப்படும். 2006ஆம் ஆண்டு முதல் சர்வதேச உணவுக் கொள்கை ஆராய்ச்சி நிறுவனம் என்ற அமைப்பால் இந்தத் தரவரிசைப் பட்டியல் வெளியிடப்படுகிறது. 2019ஆம் ஆண்டுக்கான பட்டியல் தற்போது வெளியாகியுள்ளது.

இதில் இந்தியா 102வது இடத்தில் இருக்கிறது. தெற்கு ஆசிய நாடுகளில் 100 இடங்களுக்குக் கீழ் உள்ள ஒரே நாடு இந்தியாதான். பிரிக்ஸ் நாடுகளில் ஒன்றான இந்தியா அந்த அமைப்பைச் சேர்ந்த பிற நாடுகளைவிட மிக மிகப் பின்தங்கியிருக்கிறது. அந்த அமைப்பில் உள்ள நாடுகளில் தென் ஆப்பிரிக்கா பெற்ற 59வது இடம்தான், இந்தியாவுக்கு அடுத்த குறைவான இடம்.

2014ஆம் ஆண்டு முதல் 2018ஆம் ஆண்டு வரையான புள்ளிவிவரங்களைப் பிரதிபலிப்பதாக இந்தத் தரவரிசைப் பட்டியல் அமைந்துள்ளது. நாட்டின் மக்கள் தொகையில் ஊட்டச்சத்துக் குறைபாடு கொண்ட குழந்தைகள் எண்ணிக்கை, ஐந்து வயதுக்கு உட்பட்ட போதிய உடல் எடை இல்லாத குழந்தைகளின் எண்ணிக்கை அல்லது வயதுக்கு ஏற்ப போதிய உடல் எடை இல்லாத குழந்தைகள் எண்ணிக்கை மற்றும் ஐந்து வயதுக்குள் இறக்கும் குழந்தைகளின் எண்ணிக்கை ஆகியவற்றைக் அடிப்படைக் காரணிகளாகக் கொண்டு இந்தப் பட்டியல் உருவாக்கப்பட்டுள்ளது.

இந்தத் தரவரிசையில் 117 நாடுகள் வரிசைப்படுத்தப்பட்டுள்ளன. சென்ற ஆண்டில் 103வது இடத்தில் இருந்த இந்தியா இந்த ஆண்டு ஒரே இடம் முன்னேறியுள்ளது. ஆனால், 2015இல் 93வது இடத்தில் இருந்த இந்தியா 2016இல் 97, 2017இல் 100 என தொடர்ந்து சரிவையே சந்தித்துள்ளது.

“இந்தியாவின் மிகப்பெரிய மக்கள்தொகை காரணமாக பசி ஒழிப்பில் அதன் பின்னடைவு அந்தத் (தெற்காசிய) பிராந்தியத்தின் நிலையையே பின்தங்கியதாகக் காட்டுகிறது. இந்தியாவில் குழந்தைகள் இறப்பு விகிதம் 20.8 சதவீதம் என்பது மிக அதிகம். இந்தப் பட்டியலில் உள்ள வேறு எந்த நாட்டைவிடவும் அதிகம்.” என்று தரவரிசைப் பட்டியல் குறித்த அறிக்கை தெரிவிக்கிறது. இந்தியாவின் இந்த நிலைமையால் தெற்காசியாவின் பசி ஒழிப்புச் செயல்பாடு ஆப்பிரிக்காவின் சகாராவுக்குக் கீழுள்ள நாடுகளைவிட மோசமாக இருப்பது போன்ற தோற்றம் உருவாகிறது.

இந்தியாவில், பிறந்து 6 முதல் 23 மாதங்கள் வரையான காலத்தில் போதுமான ஊட்டச்சத்துள்ள உணவு ஊட்டப்படும் குழந்தைகள் எண்ணிக்கை 9.6 சதவீதம் மட்டுமே. (மத்திய சுகாதாரத்துறை தரும் புள்ளிவிவரத்தில் இது 6.4 சதவீதம்தான் என இன்னும் குறைவாகவே உள்ளது.)

உலகளாவிய பசி ஒழிப்பு தரவரிசையில் முன்னேறியுள்ள வங்கதேசத்துக்கு இந்த அறிக்கையில் பாராட்டு கிடைத்துள்ளது. அந்நாடு “விரிவான பொருளாதார வளர்ச்சி, கல்வி, சுகாதாரம் மற்றும் உடல்நலம் ஆகியவற்றில் ஊட்டச்சத்துமிக்க உணவுக்கு முக்கியத்துவம் தந்திருப்பது” போன்றவைச் சுட்டிக்காட்டியிருக்கிறது.

நேபாளம் 2000க்குப் பின் அதிகபட்ச முன்னேற்றம் கண்டுள்ளது. குடும்பப் பெண்களின் சொத்துக்கள் அதிகரிப்பு (இது அவர்களின் நலனுக்கு முக்கியக் அளவீடாகக் கருதப்படுகிறது), தாய்வழிக் கல்வி, சுகாதார மேம்பாடு, ஊட்டச்சத்து விழிப்புணர்வு நிகழ்ச்சிகளை நடைமுறைப்படுத்தி அவற்றை பயன்படுத்தவும் வைத்தது, குழந்தைகளை பிறப்புக்கு முன்பும் பின்பும் பேணுவது பற்றிய வழிகாட்டும் முயற்சிகள் போன்றவற்றை நேபாளத்தின் வளர்ச்சி அதிகரித்ததன் காரணம் எனச் சுட்டிக்காட்டியிருக்கிறது.
பசி ஒழிப்பு தரவரிசையில் ஒவ்வொரு நாடும் 100 க்கு இத்தனை புள்ளிகள் என மதிப்பீடு செய்யப்படும். இதில் பூஜ்ஜியம் பெறுவதே சிறந்ததாகும். 10 புள்ளிகள் வரை பெறும் நாடுகள் குறைந்த அளவு பசிக் கொடுமை உள்ள நாடுகள் என அடையாளப்படுத்தப்படுகின்றன. 20 முதல் 34.9 புள்ளிகள் பெறுபவை தீவிர பசிக் கொடுமை உள்ளவை எனவும் 35 முதல் 49.9 புள்ளிகள் பெறுபவை கவலைக்கிடமானவை எனவும் 50 மற்றும் அதற்கு அதிகமான புள்ளிகளைப் பெறுபவை மிகவும் கவலைக்கிடமானவை என்றும் குறிப்பிடப்படுகின்றன.

இந்தியா இதில் 30.3 புள்ளிகள் பெற்று தீவிர பசிக் கொடுமை கொண்ட நாடுகளில் ஒன்றாக உள்ளது. பசிக் கொடுமை கவலைக்கிடமாக உள்ள நாடுகளாக நான்கே நாடுகள் உள்ளன. மத்திய ஆப்பிரிக்கக் குடியரசு என்ற நாடு மட்டும் மிகவும் கவலைக்கிடமான நிலையில் உள்ள நாடாக மதிப்பிடப்பட்டுள்ளது.

இந்தத் தரவரிசைப் பட்டியல் தொடர்பான அறிக்கையில் பருவநிலை மாற்றம் பசிக் கொடுமை பல நாடுகளில் கவலைக்கிடமான நிலைக்குச் செல்வதற்கான சாத்தியத்தைக் காட்டுகிறது எனவும் ஏற்கெனவே மோசமான நிலையில் உள்ள நாடுகளில் பசி ஒழிப்புக்கான வாய்ப்பு பருவநிலை மாற்றத்தால் பாதிக்கப்படுகிறது எனவும் எச்சரித்துள்ளது. மேலும், பருவநிலை மாற்றம் உணவின் பாதுகாப்பு மற்றும் தரத்தை பாதிப்பதாகவும் விளையும்போதே உணவுப் பொருட்களில் ஊட்டச்சத்துக்கள் குறையவும் காரணமாக இருப்பதாகவும் தெரிவித்துள்ளது.

2000க்குப் பின் பசி ஒழிப்பில் முன்னேற்றம் காணப்பட்டாலும், பசியில்லாத உலகம் என்ற நிலை எட்டுவதற்கு நீண்ட தொலைவுக்குச் செல்ல வேண்டும் என்றும் கூறியிருக்கிறது.

• சூரியன்