ஓ.பன்னீர்செல்வத்தின் பிரசார வாகனம் கவிழ்ந்து விபத்து!
துணைமுதல்வர் ஓ.பன்னீர்செல்வத்தின் பிரசார வாகனம் சாலையில் கவிழந்து விபத்துக்குள்ளானது. அதிர்ஷ்டவசமாக இந்த விபத்தில் ஓட்டுநருக்கு மட்டும் லேசான காயம் ஏற்பட்டதாக தெரிவிக்கப்பட்டுள்ளது.
மக்களவைத் தேர்தல் நெருங்கி வரும் நிலையில் அரசியல் கட்சித் தலைவர்கள் அனல் பறக்கும் பிரசாரத்தில் ஈடுபட்டு வருகின்றனர். இந்நிலையில் துணைமுதல்வர் ஓ.பன்னீர்செல்வம் இன்று ஒருநாள் நீலகிரியில் பிரசாரம் மேற்கொள்வதாக திட்டமிடப்பட்டது.
துணைமுதல்வர் பன்னீர்செல்வத்தின் பிரசாரத்திற்காக தயாரிக்கப்பட்ட பிரத்யேக சொகுசு வாகனம் ஊட்டியில் இருந்து கூடலூருக்கு கொண்டு செல்லப்பட்டது. அப்போது நடுவட்டம் என்ற பகுதியில் வாகனம் வந்தபோது திடீரென சாலையில் கவிழ்ந்து விபத்துக்குள்ளானது.
சாலையின் அருகிலேயே மிகப்பெரிய பள்ளம் இருந்த நிலையில் வாகனம் சாலையில் விழுந்ததால் யாருக்கும் பெரிய அளவில் யாரும் பாதிக்கப்படவில்லை என்றும், ஓட்டுநருக்கு மட்டும் லேசான காயம் ஏற்பட்டுள்ளதாக தெரிவிக்கப்பட்டுள்ளது. மாற்று வாகனத்தில் துணைமுதல்வர் தனது பிரசாரத்தைத் தொடர்ந்தார்.
