ஜாமீன் கிடைச்சும் வெளியே வரமுடியாத சூழல் : நிர்மலா தேவியை கைவிட்ட உறவுகள், நண்பர்கள்!

அருப்புக்கோட்டையில் உள்ள கல்லூரியில் பேராசிரியராக இருந்தவர் நிர்மலா தேவி. இவர் மாணவிகளை தவறாக நடத்த முயன்றதாக ஆடியோ வெளியாகி, பெரும் அதிர்ச்சியை ஏற்படுத்தியது. அதில் மதுரை பல்கலைக்கழகத்தில் பணியாற்றும் உயர் அதிகாரிகளிடம் ஒத்துழைக்குமாறு மூளைச் சலவை செய்யும் வகையில் பேசியிருந்தார். இதையடுத்து அவர் கைது செய்யப்பட்டு, போலீசார் விசாரணை மேற்கொண்டு வந்தனர்.
இந்த வழக்கு சிபிசிஐடிக்கு மாற்றம் செய்யப்பட்டு, ஸ்ரீவில்லிபுத்தூர் மாவட்ட மகளிர் நீதிமன்றத்தில் நடைபெற்று வருகிறது. இந்த வழக்கு விசாரணையில், பேராசிரியர் முருகன், ஆராய்ச்சி மாணவர் ஆகியோர் கேட்டுக் கொண்டதால் தான், மாணவிகளை தவறாக வழிநடத்த முயற்சித்ததாக நிர்மலா தேவி வாக்குமூலம் அளித்தார்.
இதையடுத்து கைது செய்யப்பட்ட அவர்கள், உச்சநீதிமன்றம் வரை சென்று ஜாமீனில் விடுவிக்கப்பட்டனர். இதற்கிடையில் 300 நாட்களுக்கு மேலாக சிறையில் இருந்து வந்த நிர்மலா தேவிக்கு, பலமுறை ஜாமீன் கேட்டும் வழங்கப்படவில்லை.
இந்த சூழலில் சிறையில் நிர்மலா தேவிக்கு பாலியல் தொல்லை அளிக்கப்படுவதாகவும், சிறையில் போதிய அடிப்படை வசதிகள் செய்து தரப்படவில்லை என்றும் அவரது வழக்கறிஞர் பரபரப்பு புகார் தெரிவித்தார்.
இந்நிலையில் வழக்கு விசாரணைக்காக, உயர்நீதிமன்ற மதுரைக் கிளையில் ஆஜரானார். அப்போது அவரது ஜாமீன் மனுவை நீதிபதிகள் விசாரித்தனர். இந்நிலையில் அரசு தரப்பில் எந்தவித ஆட்சேபனையும் தெரிவிக்கப்படாததால், நிர்மலா தேவிக்கு ஜாமீன் வழங்கி உத்தரவிட்டனர்.
ஆனால் விசாரணைக்கு தொடர்ந்து ஒத்துழைக்க வேண்டும், ஊடகங்களுக்கு பேட்டியளிக்கக் கூடாது உள்ளிட்ட நிபந்தனைகள் உடன் ஜாமீன் வழங்கப்பட்டுள்ளது. இந்த சூழலில் ஜாமீன் கிடைத்தும், வெளியே வர முடியாத சூழல் நிலவுகிறது.
ஏனெனில் ஜாமீன்தாரர்களாக பொறுப்பேற்று நிர்மலா தேவியை அழைத்துச் செல்லவும், ஆவணங்களில் கையெழுத்திடவும் உறவினர்கள் யாரும் முன்வரவில்லை என்று கூறப்படுகிறது. இதுதொடர்பாக அவரது உறவினர்களிடம் பேசி வருவதாக நிர்மலா தேவியின் வழக்கறிஞர் தெரிவித்துள்ளார்.